Қуръоннинг ҳикматлари
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
1. Ўқиганга қиёмат куни шафоатчи бўлади.
Расулуллоҳ соллаллоҳу алайҳи васаллам: «Қуръон ўқинглар, чунки у қиёмат куни соҳибига шафоатчи бўлиб келади», дедилар.
Имом Муслим Абу Умома Боҳилий розияллоҳу анҳудан ривоят қилган.
2. Ҳасталикларга шифо бўлади.
«Эй одамлар! Сизга ўз Роббингиздан мавъиза, кўксингиздаги нарсага шифо, мўминларга ҳидоят ва раҳмат келди». (Юнус сураси, 57- оят).
«У (Қуръон) иймон келтирганлар учун ҳидоят ва шифодир...». (Фуссилат сураси, 44- оят).
3. Ўқиганга раҳбар бўлади.
«Бу китобда шак-шубҳа йўқ, у тақводорларга ҳидоятдир». (Бақара сураси, 2- оят).
«Сенга Китобни ҳар бир нарсани баён қилувчи этиб, мусулмонларга ҳидоят, раҳмат ва хушхабар қилиб нозил қилдик». (Наҳл сураси, 89- оят).
«Албатта, бу Қуръон энг тўғри йўлга ҳидоят қилур». (Исро сураси, 9- оят).
4. Ҳар бир ҳарфига ўнта савоб бор.
Расулуллоҳ соллаллоҳу алайҳи васаллам бу хақида: «Ким Аллоҳнинг Китобидан бир ҳарф ўқиса, унга бунинг учун бир савоб бўлади. Ҳар бир савоб эса ўн баравари(га кўпайтирилади). «Алиф. Лаам. Мийм – бир ҳарф» демайман. Балки «Алиф» бир ҳарф, «Лаам» бир ҳарф, «Мийм» бир ҳарфдир», дедилар».
Имом Термизий ривоят қилган.
5. Қуръон ўқилган уйда барака кўпаяди.
Абу Ҳурайра розияллоҳу анҳу шундай деди:
«Қуръон ўқилган уй эгалари учун кенг бўлади, унга фаришталар ташриф қилишиб, шайтонлар тарк этишади ва барака кўпаяди. Қуръон ўқилмайдиган уй эгалари учун тор бўлади, уни фаришталар тарк этишиб, шайтонлар келишади ва барака кетади».
Имом Доримий ривоят қилган.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
