Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Кундан кунга Қуръони Карим ва Суннати мутоҳҳарадаги илмий мўъжизалар, ҳақиқатлар илмий томондан ҳам аниқланмоқда. Ушбу мақолада Пайғамбаримиз соллаллоҳу алайҳи васалламнинг ҳадисларида баён қилинган ва яқин йиллар ичида аниқланган илмий ҳақиқатлар зикр этилади.

Қўлларни ювиш
Набавий поклик усулларидан яна бири уйғонгандан сўнг қўлларни ювиш, ухлаш вақтида қўлларда қолган микроблар, тер қолдиқлари ва ёғларни олиб ташлашдир. Бинобарин, бугунги кунда олимлар касалликларнинг олдини олиш учун қўл ювиш муҳимлигини таъкидламоқдалар. Шу ерда Пайғамбаримиз соллаллоҳу алайҳи васаллам ҳадиси шарифларининг аҳамияти ойдинлашади. Зеро, у зот соллаллоҳу алайҳи васаллам: «Агар сизлардан бирингиз уйқудан уйғонса, қўлини уч марта ювмагунча идишга солмасин» деб марҳамат қилганлар.
Бухорий ва Муслим ривояти.

عَنْ أَبِي هُرَيْرَةَ رَضِي اللهُ عَنْهُ ، النَّبِيِّ صَلَّى اللهُ عَلَيْهِ وَسَلَّمَ قَالَ: إِذَا اسْتَيْقَظَ أَحَدُكُمْ مِنْ نَوْمِهِ فَلَا يُدْخِلْ يَدَهُ فِي الْإِنَاءِ حَتَّى يَغْسِلَهَا ثَلَاثَ مَرَّاتٍ، فَإِنَّ أَحَدَكُمْ لَا يَدْرِي أَيْنَ بَاتَتْ يَدُهُ أَوْ أَيْنَ كَانَتْ تَطُوفُ يَدُهُ. رَوَاهُ الْخَمْسَةُ.

Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам: «Бирортангиз уйқусидан уйғонса, қўлини уч марта ювмасдан туриб, уни идишга солмасин. Чунки ҳеч бирингиз қўли қаерда тунаганини билмайсиз ёки қўлингиз қаерда айланганини билмайсиз», дедилар».
Бешовлари ривоят қилганлар.

Пайғамбаримиз соллаллоҳу алайҳи васалламга қўлларни ювишнинг аҳамияти ҳақида ким хабар берган?!
Албатта, у зоти бобаракотга бу ҳақда Аллоҳ таолонинг Ўзи хабар бергандир!
(Давоми бор)

Абдуддоим Каҳел мақоласи ва Islom.uz маълумотлари асосида Нозимжон Ҳошимжон тайёрлади

Ушбу мақола Ўзбекистон Республикаси Дин ишлари бўйича қўмитанинг 2024 йил 21 февраль 03-07/921-сонли хулосаси асосида тайёрланди.